Өчигдөр /2026.08.21/ Засгийн газар мэдээлэл хийхдээ бүсээ чангалж, 1.4 их наядын зардлыг хэмнэнэ гэж мэдэгдсэн. Ингэснээр иргэдээ үнийн өсөлтөөс, бага орлоготой иргэдээ инфляцаас үүдэлтэй өргөн хэрэглээний бараа бүтээгдэхүүний үнийн өсөлтөөс хамгаална. Стратегийн нөөцүүдийг тодорхой түвшинд тогтворжуулна гэв. 

Хоржоонтой нь Ерөнхий сайд “Хүйтэн өвөл болно, дотоод эв нэгдлээрээ давна” гэх.

Ер нь өнөөдрийн нөхцөл байдал, иргэдийн амьдрал ямар түвшинд байна вэ. Тэд мэдрээд, мэдээд энэ төсвийн тодотголыг өргөн мэдүүлсэн байх. Гэхдээ иргэдийн амьдрал төсөөлснөөс нь хэд дахин дор байгаа болов уу. Учир нь эрх баригчид амьдралаас тасраад удаж байна. Нийгмийн сүлжээний хөөс дагаж попорсоор “живлээ”.

УИХ, Засгийн газрын гишүүдийн хэд нь төрийн ордон, хотын төв, амьдардаг орд харшаасаа холдож хотынхоо нөгөө захад очиж хардаг бол. Тэнд л жинхэнэ амьдрал буцалдаг биш үү. 

Уулын орой, жалга судаг бараадсан хашаагүй, тог цахилгаангүй, хоног өдрөө яая гэж байгаа олон мянган өрх бий. Ажил хийдэг, зүгээр суудаггүй, зүтгэсээр байдаг ч амьдрал нь дээшилдэггүй олон гэр бүл, залуучууд байна. Дэлгүүрүүдийн өрийн дэвтэр улам зузаарч, иргэдийн хэтэвч нимгэрч байна. Өдөр тутмынхаа хүнсийг ширхэглэж, граммлан авч байгаа нь ч бодит үнэн. 

Ердийн таваг хоол, ширхэг өндөг, кг төмс, жижиг талх, гурил, будаа, махны үнэ хэд дахин өссөн билээ. Нэг тор хэдэн төгрөгт дүүрч, нэг айл тэр хүнсээр хэд хоног амьдарч байгаа бол.

“Тансаг хэрэглээ бүр үгүй болсон. Дундаж давхарга гэж байхгүй болсон”. Энэ бол иргэдийн үг.

Өнөөдөр нэг литр Евро 92 бензиний үнэ 4960 төгрөгт хүрлээ. Дизель болон АИ-92 бензиний үнэ дагаад нэмэгдэхгүй гэх баталгаа алга байна. Учир нь хомсдол нүүрлэсэн, иргэд олон цагаар урт дараалалд хүлээсэн хэвээр. 

Үүнийг дагаад хүнс, барааны үнэ дахин нэмэгдэх нь цаг хугацааны асуудал болов уу. Такси, тээвэр ч мөн адил. Нэмээд үйлчилгээний газруудыг мартаж болохгүй. Ийм байхад иргэддээ дотоодын эв нэгдэл тулгаж, дахиад тэвчээрэй гэх нь хэр зохилтой вэ!