Дорнод аймгийн Халхгол суманд дөрөв хоногийн өмнө гарсан түймрийг өнөөдөр цурамд оруулсан тухай Онцгой байдлын ерөнхий газар мэдэгдлээ. Товчхондоо одоог хүртэл бүрэн унтраагүй байна.

Уг түймрийн галыг Мобикомнынхон тухайн бүс нутагт алдсан гэдгээ хүлээн зөвшөөрөөд буй. Тодруулбал, хийсэн ажлаа хүлээлгэж өгөх үйл ажиллагаанд оролцох, шалгах, цаашид сайжруулах боломжийг судлах, газар орны нөхцөл байдалтай танилцах үеэр тээврийн хэрэгсэлд гал гарч түймрийн шалтгаан болсон гэж тайлбарлажээ.

Харин тэдэнтэй хамт явсан УИХ-ын гишүүн У.Отгонбаяр одоогоор ямар ч мэдэгдэл хийгээгүй байна. Өөрөөр хэлбэл гавьяаг нь үүрэлцчихээд яваад өгсөн бололтой. Өнөөдөр тэр Сүхбаатар аймгаас нүүр номынхондоо шинэ долоо хоногийн мэнд дэвшүүлжээ.

Нөмрөгийн дархан цаазат газар гурав хоног шатахад тэр цахим хуудастаа лав түймэртэй холбоотой цэг ч тавиагүй байна.

У.Отгонбаяр бол энэ парламентад анх удаагаа сонгогдсон сул гишүүдийн нэг. Тэр чуулгандаа сууж харагдах ч асуулт асуух, үг хэлэх гэдгийг бараг мэдэхгүй. Манлайлал, оролцоо байхгүй “хэлгүй” гишүүдийн нэг. Эл асуудал дээр ч яг л чуулгандаа сууж буй мэт байлаа, тэр. Товчоор бол төрд хэрэггүй хүн ажээ.