Өчигдрийн УИХ-ын чуулганы хуралдаанаар Нийгмийн халамжийн тухай хуулийн шинэчилсэн найруулгыг хэлэлцэв.

Тус хуулийн шинэчилсэн найруулгаар 9 хүний бүрэлдэхүүнтэй ахмад настан, хөгжлийн бэрхшээлтэй хүний бие даан амьдрах чадамж, хэрэгцээний цогц үнэлгээ хийх чиг үүрэг бүхий мэргэжлийн хамтарсан зөвлөл байгуулна гэлээ. Энэ хүрээнд салбарын сайд Т.Аубакирын хэлсэн үг анхаарал татаж байна.

Түүний хэлж байгаагаар,

Тухайлсан айлуудаар орж хөдөлмөр эрхлэх чадвартай хэр нь хөдөлмөр эрхлэхгүй, орлогоо өсгөхийг хичээхгүй байгаа шалтгаан, нөхцөлийг нь тодорхойлох гэнэ. Өөрөөр хэлбэл энэ харилцааг дээр дурдсан хуулийн шинэчилсэн найруулгад тусгаж, оруулж иржээ.

Aйлуудад очиход хөдөлмөр эрхлэх насны залуучууд байдаг ч хөдөлмөр эрлэхгүй байна. Энэ нь ажил олдохгүй учраас хийхгүй байгаа зүйл биш. Хөдөлмөр эрхлэх эрмэлзэл тэнд байна уу гэдэг л асуудал гэв.

Тиймээс тухайн хүний хөдөлмөр эрхэлдэггүй шалтгааныг асууж, тодорхой болгож, ажлын байранд зуучлах дасгалжуулагч багш, “көүч”-тэй болгох аж.

Мөн тэрбээр,

“Мэдээж эрмэлзэлтэй, гараад ажил хийгээд дэвжиж, дээшилж байгаа маш олон хүн бий. Нөгөө талд үе дамжсан ядуурал бий болсон. Бодит байдлыг нуугаад ярихгүй байж болохгүй” гэсэн юм.