Хотын дарга Х.Нямбаатарыг огцруулснаар түүний халааг хэн авах, шинэ хотын даргыг нэр дэвшүүлэх, томилох үйл явц өрнөж эхэлсэн. Одоогоор МАН-ын Нарийн бичгийн дарга, тус намын дэргэдэх Социал Демократ Монголын залуучуудын холбооны Ерөнхийлөгч Д.Пүрэвдагвыг нэр дэвшүүлэх асуудал идэвхтэй яригдаж байна. Нийслэлийн Засаг даргад нэр дэвшигчийг тодруулах нь хэн нэг улстөрчийг сонгох, дэмжих үйл явцаас гадна улс төрийн намууд, тэр дундаа эрх баригчдын дотоод ардчиллыг харуулах чухал үйл явц юм. Өөрөөр хэлбэл, хэнийг нэр дэвшүүлэх нь МАН-ын нийслэлд хэрэгжүүлэх мөрийн хөтөлбөр цаашид хэрхэн тогтвортой хэрэгжиж, биелэлт ямар түвшинд хангагдах вэ гэдэгт урьдчилсан хариулт болно. Харин том улс төр талаас нь харвал, энэхүү томилгооны процесс нь МАН-ын дарга Н.Учрал нам дотроо бүрэн хүлээн зөвшөөрөгдөж чадаж байгаа эсэхийг харуулах нэгэн чухал ажиглалт болох юм. Ерөнхий сайдын баг ч Д.Пүрэвдагвыг дараагийн хотын даргад нэр дэвшүүлэх асуудлыг ил тод дэмжиж байна. Тэгвэл нэр дэвшихээр яригдаж буй тэрээр нөгөө талаараа Ерөнхийлөгчийн хүргэн, намын дарга Н.Учралын ойрын хүрээлэл төдийгүй Д.Амарбаясгалантай сайн харилцаатай дундын хувилбар юм. Тэгвэл уг нэр дэвшүүлэлтээс улбаалан МАН-ын удирдлага Ерөнхий сайд асан Г.Занданшатарыг 2027 оны Ерөнхийлөгчийн сонгуульд дэмжихгүй байгаа юу гэх асуултыг бий болгож байна.