Хотын дарга асан Х.Нямбаатарын удирдлага дор ажиллаж байсан хэд хэдэн албан тушаалтнуудыг хууль хяналтын байгууллагаас шалгаж байсан билээ. Тэгвэл АТГ-т шалгагдаж байсан Нийслэлийн Засаг даргын нэгдүгээр орлогч асан Т.Даваадалайд холбогдох хэргийн мөрдөн шалгах ажиллагаа дуусаж, хэргийг шүүхэд шилжүүлэх саналтайгаар прокурорт хүргүүлжээ.
Тодруулбал, Т.Даваадалай нь өөрийн төрсөн дүү болох “Метро” төслийн менежер Т.Мөнхдалай, “Тойрог авто зам” төслийн менежер А.Ербол болон нэр бүхий аж ахуйн нэгжийн захирал Н.Б нартай бүлэглэн 5.2 тэрбум төгрөгийн хахууль авч, 16.9 тэрбум төгрөгийн тендерийн ажилд хууль бусаар давуу байдал олгосон байна.
Т.Даваадалай нь 5.2 тэрбум төгрөгийн хахуулиа өөрийн хамаарал бүхий этгээд буюу эхнэр Б.Анхтуяагийн үүсгэн байгуулсан компаниар дамжуулан, 2025 оны 4 сарын 9-нөөс 10 дугаар сарын 27-ны өдөр хүртэлх хугацаанд авч, мөнгө угаасан гэж үзжээ.
2026 оны байдлаар Улаанбаатар хотод шинэ орон сууцны 1 м.кв нь дунджаар 5.03 сая төгрөгийн үнэтэй байна. Энэ үнээр ойролцоогоор 60 м.кв байр авлаа гэж бодоход нэг байранд 301.8 сая төгрөг зарцуулах нь. Тэгвэл Т.Даваадалайгийн хахуулиар олсон гэх 5.2 тэрбум төгрөгөөр ойролцоогоор 17 өрх шинэ байртай болох боломжтой гэсэн үг.
Бүр энгийнээр жишвэл, 5.2 тэрбум төгрөгөөр 150 ортой хүүхдийн цэцэрлэг нэгийг барих боломжтой.
Мөрдөн шалгах ажиллагаа ямартай ч дуусаж, хахууль авсан, мөнгө угаасан, давуу байдал олгосон гэх үйлдлийг нь тогтоолоо. Тэгвэл гэр бүлээрээ бүлэглэж гэмт хэрэг үйлдсэн этгээдүүдэд прокурорын байгууллага нь, шүүх засаглал нь ямар ял оноож, хэр үнэн шударгаар шүүхийг харах л үлдлээ.
