D-Parliament сайтаар дамжуулан 20 гаруй нийтийн өргөдөлд иргэдийн гарын үсгийг цуглуулж байна. Дараах хоёр өргөдөл иргэдээс илүү дэмжлэг авчээ. 

Нэг. Түгжрэл, авто замын ачааллыг багасгах, зам тээврийн осол, гэмтлийг бууруулах зорилгоор хоёр жилийн өмнөөс тээврийн хэрэгслийн улсын дугаар олголтыг зогсоосон. Өөрөөр хэлбэл улсын дугаартай тээврийн хэрэгслийн тоог 730,000 дээр барихаар тогтсон. Одоо ч тухайн тогтоол хүчин төгөлдөр мөрдөгдөж буй.

Тэгвэл хүчингүй болгуулахаар иргэн Д.Галсанцэрэн “Тээврийн хэргэслийн улсын дугаар олгохыг хязгаарлах журaм”-ыг цуцлах нийтийн өргөдөл санаачилжээ. 

Тэрбээр, 

“Тээврийн хэрэгслийн улсын дугаар олгохыг тоогоор хязгаарласан журам нь Монгол Улсын Үндсэн хуульд заасан иргэний өмчлөх эрхийг бодитоор хязгаарлаж, иргэдийн хууль ёсны эрх, ашиг сонирхолд сөргөөр нөлөөлж байна. Уг журам хэрэгжиж эхэлснээс хойш замын хөдөлгөөний түгжрэлийг бууруулах үндсэн зорилго нь бодит үр дүнд хүрсэн нь тодорхой бус хэвээр байгаа бөгөөд нөгөө талаас улсын дугаарын хомсдол, автомашины үнийн өсөлт, дамлан худалдаалах нөхцөл бүрдэх зэрэг сөрөг үр дагавар үүссэн” гэж үзжээ. 

Одоогоор 17,476 иргэн гарын үсэг зураад байна. 

Хоёр. Монгол Улсын Засгийн газрын 2026 оны долоодугаар сарын 1-ний өдрийн тогтоолоор олон улс, улсын чанартай авто зам ашигласны төлбөрийн хэмжээг шинэчлэн тогтоосон. Уг шийдвэрийг гурав хоногийн өмнөөс /2026.08.01/ мөрдөж эхлээд байна. 

Шинэчилсэн тарифаар суудлын автомашины авто зам ашигласны төлбөр 100 төгрөгөөс 500 төгрөг, ачааны автомашины төлбөрийг 10,000 төгрөгөөс 20,000 төгрөг болсон. 

Харин иргэн Э.Батбаяр цуцлуулахаар нийтийн өргөдөл мөн санаачилжээ. Өргөдлийн хугацаа энэ сарын 27-ны өдөр дуусна. Өнөөдрийн байдлаар 6,937 иргэн гарын үсэг зураад байна. 

Аливаа нийтийн өргөдлийг дэмжиж 100,000 иргэн гарын үсэг зурсан тохиолдолд тухайн асуудлыг УИХ-аар хэлэлцүүлэх боломж бүрддэг юм.