Цөлжилттэй тэмцэх конвенцын талуудын 17 дугаар бага хурал хоёр дахь өдрөө манай улсад үргэлжилж байна. СОР17 бага хурал 12 хоног үргэлжилнэ. Нийтдээ 197 орны зочид, төлөөлөгчид оролцож буй. Тэгвэл энэ хурлын тухай хэн юу хэлэв.

Ерөнхий сайд Н.Учрал:

Өнөөдөр бид өөрсдөдөө нэгэн асуултыг зоригтой, нээлттэй тавих цаг иржээ. Бид их ярьж, их тунхаглаж бол чадсан. Харин үгээ үйлдэл болгож чадаж байна уу. Өмнөх хурлууд бүгд үр дүнтэй болсон ч дэлхий нийт зорилго, амлалтаар дутаагүй нь бас үнэн. Амлалтыг харин бодит үр дүн болгох нөөц бололцоо, санхүүжилт, технологи, институцийн орчин бидэнд одоо илүү хэрэгтэй байна. Тиймээс COP17 бол өмнөх шийдвэр, тунхаглалыг давтах бус, хэрэгжилтийг хурдасгах бага хурал байх учиртайг би онцолмоор байна.

Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурлын дарга Б.Батцэцэг:

Цөлжилт, газрын доройтол, гангийн үр дагавар бидний хувьд холын сураг бус, амьдралд бодитоор тулгарч буй асуудал, сорилт билээ. Монгол Улс энэхүү чуулганыг алив саадгүй, бүхний оролцоог хангасан, ил тод явуулахын төлөө бүхий л хүчин чармайлтаа гаргана. Та бүхний байр суурийг хүндэтгэн сонсож, яриа хэлэлцээг төвч байр сууринаас чиглүүлэн, зөвшилцөлд хүргэхийн төлөө уйгагүй зүтгэх болно

Байгаль орчин, уур амьсгалын өөрчлөлтийн дэд сайд Б.Мөнхтамир:

COP17 бол газрын нөхөн сэргээлтийг өргөжүүлэхэд шаардлагатай санхүүжилтийг нэмэгдүүлэх, уялдаа холбоог бэхжүүлэх, хэрэгжүүлэх таатай нөхцөлийг бүрдүүлнэ

Эрүүл мэндийн сайд Э.Батшугар:

Олон улсын томоохон хурлын үеэр гадаад, дотоодын төлөөлөгч, оролцогчдын эрүүл мэнд, аюулгүй байдлыг хангах нь нэн тэргүүний зорилт. Шаардлагатай үед эмнэлгийн тусламжийг цаг алдалгүй хүргэхийн тулд хүний нөөц, тоног төхөөрөмж, эм, эмнэлгийн хэрэгслийн бэлэн байдлыг бүрэн хангаж, яаралтай тусламжийн зохион байгуулалтыг шуурхай байлгах ёстой