УИХ-ын чуулганы хуралдаан ирц хангагдаагүй шалтгаанаар хоёр удаа хойшлоод байна. Өнөөдөр 14.00 цагаас дахин хуралдах товтой.

Хуралдаанаар Хууль зүй, дотоод хэргийн сайдаар УИХ-гишүүн Г.Тэмүүлэнг танилцуулах юм. Үүнтэй холбоотойгоор ирц бүрдэхгүй байгаа. Өөрөөр хэлбэл, МАН-ын дотоод хагарлаас энэ бүхэн үүдэлтэй. Бүр тодруулбал, МАН-ын гучийн талынхан буюу Д.Амарбаясгалан, Л.Оюун-Эрдэнэ тэргүүтэй 20 хүн гол нөлөөг үзүүлж байна. Нэмээд тэдний талд Н.Номтойбаяр тэргүүтэй Үндэсний эвслийн дөрвөн гишүүн бий.

Гучийн талаас Засгийн газарт Ц.Сандаг-Очир, Ч.Номин, Ж.Алдаржавхлан, Ц.Идэрбат, С.Амарсайхан нарын таван ч сайд байв. Энэ дундаас С.Амарсайханыг “сугалсан”. Түүний оронд 38 талаас Г.Тэмүүлэнг томилох процесс эд өрнөж байгаа ч тохиролцож чадахгүй хэд хонов.

Ирцийг харвал сайд нараас Н.Номтойбаяр, Ч.Номин хоёр ирцдээ орохгүй байгаа. Тэднийг “хөөгдөх болзлоо хангасан” гэцгээж байна. Гэвч Н.Номтойбаяр өөртэйгөө нийлээд дөрвөн кноптой. МАН хуваагдсан энэ үед аль ч талд тэр нүүртэй, хүчтэй, хэрэгтэй гэсэн үг. Одоогоор гучийн талд зогсoж буй. Харин Ч.Номинг хөөлөө гэхэд тэдний талыг улам хатууруулахаас цаашгүй. Үүсээд буй гацаа улам л үргэлжлэх болов уу.