Ээлжит чуулган эхлэхээс долоо хоногийн өмнө ээлжит бус чуулганыг зарлан хуралдуулсан. Ээлжит бус чуулганаар 2026 оны төсвийн тодотголыг хэлэлцсэн. Гэсэн ч баталж амжаагүй, гуравдугаар хэлэлцүүлэг ч эхлээгүй байна.
Төсвийн тодотгол хэлэлцэх үеэр “босож” ирсэн нэг асуудал бол Ерөнхий сайд Н.Учралын хамаарал бүхий хувийн сургуульд 3.5 тэрбум төгрөгөөр тоног төхөөрөмж авч өгөхөөр тусгасан байсан гэх асуудал. Тодруулбал, Н.Учралын ээж захирлаар нь ажилладаг “Их засаг кинг” сургууль нэр холбогдоод буй. Харин Ерөнхий сайд болон тус сургуулийн захирал үгүйсгэж, “гүрийсээр” давсан.
Гэтэл эл асуудал намжилгүй явсаар 8.3 тэрбум төгрөгийн санхүүжилт авсан болж “томров”. Энэ асуудлыг Ардчилсан намын нарийн бичгийн дарга Г.Лхагвадорж баримтаар дэлгээд байна.
Түүний хэлж буйгаар, Ерөнхий сайд Н.Учралын хамаарал бүхий 3 сургууль, цэцэрлэг 8.3 тэрбум төгрөгийн санхүүжилт улсаас авчээ. Энэ нь 2023-2026 оны хооронд буюу гурван жилийн хугацаанд авсан нийт санхүүжилтийн дүн аж.
