Эрх баригч Монгол Ардын намын хагарал сөрөг хүчин Ардчилсан намд халдварлажээ. Ардчилсан намын лидерүүд болох Ерөнхийлөгч асан Ц.Элбэгдорж, Хотын дарга асан Э.Бат-Үүл нар өнгөрсөн амралтын өдрүүдээр цацагдсан ярилцлагынхаа үеэр өнөөгийн улс төрийн талцал, хямралын аль талд нь байгаагаа маш тодорхой илэрхийлсэн.

Улмаар даваа гарагт МАН-ын дотоод хуваагдлын нэг тал болох 30-ийн бүлэг чуулганы ирцийг бойкот хийх зуур АН-ын нэр бүхий гишүүд бүлгийн шийдвэрээ зөрж ирцдээ орсон. “МАН-ын дуудлагын 5” гэж шүүмжлэгдсэн гишүүд үндсэндээ Ц.Элбэгдорж Ерөнхийлөгчийн тойрон хүрээлэлд багтдаг улстөрчид багтаж байгаа бөгөөд АН-ын бүлгийн дэд дарга Б.Жаргалан намын дүрмээ зөрчсөн эдгээр гишүүддээ хариуцлага тооцно гэж мэдэгдсэн. 

Харин мягмар гарагт ТЕГ-ын дарга асан Б.Хурц АН-ын намын дарга О.Цогтгэрэлийг эрх баригчдаас 54 тендер авсан. Намын дарга, бүлгийн даргын ажлаа өгөөд Д.Дорлигжав, Х.Баттулга нарын хамт намаасаа явах ёстой гэв. Хотын дарга Э.Бат-Үүл ч мөн адил саяхнаас намын даргаа хурцаар шүүмжлэх болсон. 

Ийнхүү МАН-ын дотоод хагарал АН-д халдварлаад байна. Ингэснээр эрх баригч намын гишүүд дунд 38:30 гэх хуваагдал үүссэн бол АН-д Ц.Элбэгдорж болон түүнийг тойрон хүрээлэгчдийн нөгөө талд Х.Баттулга, О.Цогтгэрэл гэсэн хагарал үүсчээ.