УИХ-ын гишүүн Э.Болормаа, О.Батнайрамдал нарын явуулсан гэх сугалаа ямар учиртай вэ.

Тэд Увс, Завхан, Ховд, Говь-Алтай аймгийн 78 сум, хоёр тосгоноос хүсэлтээ ирүүлсэн хүмүүс дундаас тус бүр нэг, нэг хүнийг сугалаагаар сонгожээ.

Сум, тосгон бүрээc сонгогдсон хүмүүсийн зардлыг УИХ-ын гишүүн Э.Болормаагийн ажлын алба дааж, Өвөр Монголын Шилийн гол аймаг руу аялуулж, малчдын туршлага судлах хөтөлбөрт хамруулах аж. Харин О.Батнайрамдал найздаа тусалжээ.

Уг аяллын хөтөлбөрийг “NomadicHUB Travel” компани зохион байгуулдаг. Эзэн нь “UB CAB”-ийн үүсгэн байгуулагч Н.Отгонбаяр. Нэг хүний зардал 550,000 төгрөг. Ингээд тооцвол 79 хүний зардал 43,450,000 төгрөг болж байна. Энэ мөнгийг Э.Болормаа гишүүний ажлын алба хариуцна гэнэ.

79 хүний зардлыг даагаад, тухайлсан нэг компанийг сонгоод явах гэж буй нь нэг талаараа Монгол Улсын Их Хурлын гишүүний ёс зүйн дүрэмд харшлах үйлдэл байж болох юм. Учир нь,

“Гишүүн бүрэн эрхээ хэрэгжүүлэхдээ хувийн ашиг сонирхлоор хэн нэг хүн, хэсэг бүлэг хүмүүс, байгууллага, аж ахуйн нэгжийн үйл ажиллагааг дэмжихийг хориглоно” гэх заалт ёс зүйн дүрэмд бий.