УИХ-ын ээлжит бус чуулган 16.00 цагаас хуралдаж, хаалтаа хийлээ.
Чуулганы хуралдаанаар 2026 оны тодотголыг төсвийн тухай болон төсвийн тогтвортой байдлын тухай хуульд заасан шалгуур, дунд хугацааны төсвийн хүрээний мэдэгдлийн тусгай шаардлага, улсын хөгжлийн жилийн төлөвлөгөөнд нийцсэн гэсэн саналыг томьёоллоор санал хураав. Ингээд оролцсон гишүүдийн 82.4 хувь нь дэмжсэн тул төсвийн тодотголыг гуравдугаар хэлэлцүүлэгт бэлтгүүлэхээр Төсвийн байнгын хороо болон бусад хороодод шилжүүллээ.
Ээлжит бус чуулганыг хааж УИХ-ын дарга С.Бямбацогт,
“Одоогоос яг долоо хоногийн өмнө улс орны эдийн засаг, төсөвт тулгарч буй бодит хүндрэл, нөхцөл байдалтай холбоотойгоор УИХ-ын ээлжит бус чуулганыг зарлан хуралдуулж, Засгийн газраас өргөн мэдүүлсэн улсын төсвийн тодотголыг хэлэлцэж эхэлсэн. Төсвийн тодотголоор улсын төсвийн зардлыг танах, хүнсний гол нэрийн бараа бүтээгдэхүүний үнийн өсөлтийг хязгаарлах, түлш шатахууны нөөц бүрдүүлэх, эрчим хүчний ситемийн найдвартай ажиллагааг хангах, цалин тэтгвэрийг нэмэгдүүлэх зэрэг иргэдийн амьдралд тулгамдсан олон асуудлыг шийдвэрлэхээр хэлэлцэж эхлээд байна.
Төсвийн тодотголын тооцооллыг сайтар нягтлан үзэх, хийдэл дутагдлыг нь засаж залруулах зүйл байхыг үгүйсгэхгүй. Үүнийг ирц оролцоо, идэвх санаачлагатай байж, эрүүл мэтгэлцээний зарчмаар оновчтой шийдэл, хувилбар дэвшүүлэн урагш ахиулах ёстой болохоос улдан чангааж, хойш сууснаар асуудал шийдэхгүй. Өрхийн орлогын үнийн өсөлтөөс хамгаалах, хүнс болон түлш шатахууны стратегийн нөөц бүрдүүлэх, төр хэмнэлтийг өөрөөсөө эхлүүлэх төсвийн тодотголоо яаралтай хэлэлцэн батлах шаардлагатай байна.
Эрхэм гишүүд ээ,
Ард түмэн та биднийг цалин тэтгэврээ нэмэх, түлш шатахууны дутагдал, цахилгаан хязгаарлалтыг хэрхэн шийдэхийг нүд цавчилгүй харж байгаа бөгөөд асуудлыг шийдэхгүй алдсан цаг хугацааны төлөөс монгол айл, өрх бүрд орлогын хомсдол, ААН бүрд санхүүгийн дарамт нэмж байгаа гэдгийг ойлгож байгаа байх. Монгол Улсын Их Хурлын тухай хуульд заасны дагуу есдүгээр сарын 15-нд намрын ээлжит чуулган эхлэхтэй холбогдуулан ээлжит бус чуулганыг хуульд заасны дагуу ийнхүү өндөрлүүлж байна. Намрын ээлжит чуулганаар төсвийн тодотгол болон улс орны өмнө тулгамдсан олон асуудлыг хэлэлцэн шийдвэрлэгдэхээр хүлээгдэж байгаа тул гишүүд хуралдаандаа идэвхтэй оролцож зөв, мэргэн шийдвэр гаргахыг хүсье. УИХ-ын ээлжит бус чуулган хаасныг мэдэгдье” гэлээ.
