УИХ-гишүүн, Ерөнхийлөгч асан Х.Баттулга 126 гишүүнийг таслалтаараа тэргүүлдэг. Чуулгандаа суудаггүй. Түүний ар дээр Ерөнхий сайд асан Л.Оюун-Эрдэнэ таслалт болон чөлөөтэйгөөрөө бичигддэг. Өөрөөр хэлбэл УИХ-ын гишүүний суудлыг тэд юман чинээ тоолгүй, ордны гаднаас л улс төр хийж яваа.
Эргэн сануулбал, 2024 оны сонгуулиар Л.Оюун-Эрдэнэ намаа ахалж сонгуульд өрсөлдсөн, ялуулсан. Гэсэн ч намынхаа дотоод зөрчилд бүдэрч огцорсон. Гэхдээ л тэр УИХ-ын гишүүн. Тойргоо, сонгогчдоо төлөөлөх үүрэгтэй. Ерөнхийлөгч асан Х.Баттулга мөн адил. Тэдэн дээр УИХ-ын дарга асан Д.Амарбаясгалан ч нэмэгдэнэ. Түүний хувьд ердөө 17 удаа л чуулганы хуралдаанд суусан байна.
Товчхондоо өмнөх жилүүдэд төрийн өндөр сэнтийд заларч явсан тэд УИХ-ын гишүүнийхээ суудлыг чамлаж, голсоор өнөөдрийг хүрэв.
