Нөмрөгийн дархан цаазат газрын 80 хувь шатсан асуудал 18 хоногийн дараа Засгийн газрын анхааралд оров. Өчигдөр Ерөнхий сайд холбогдох салбарын сайд нар болон ОБЕГ, Хил хамгаалах ерөнхий газрын дарга тэргүүтэй хүмүүстэй уулзлаа. Ингэхдээ Дархан цаазат газар руу нэвтрэх зөвшөөрөл олгосон зэрэг холбогдох хүмүүст хариуцлага тооц гэсэн.
Тодруулбал, Хилийн боомтын захиргааны дарга Э.Гантулга, Хилийн цэргийн 0198 дугаар ангийн захирагч Б.Гантөгс нарыг ажлаас нь чөлөөлж Дорнод аймгийн засаг дарга Ш.Ёлд сануулах арга хэмжээ авахыг үүрэг болгов.
Харин нийгмийн сүлжээнд Н.Учралын өгсөн үүрэг чиглэл шүүмжэл дагуулаад байна. Өөрөөр хэлбэл, “ажил үүргээ гүйцэтгэсэн гэмгүй хилчдээр асуудлыг намжаах гэлээ. Буруутан нь тодорхой байна” гэх зэрэг байр суурийг тус газарт томилолтоор ажилласан сэтгүүлч болоод хилчид, мөн иргэд илэрхийлж байна.
