Засгийн газрын дэмжлэгтэй, хөнгөлөлттэй зээлийн санхүүжилтээр 18 аж ахуйн нэгж газрын тосны бүтээгдэхүүний 22 агуулах барьж, өргөтгөж байгаа аж.

Тодруулбал, “Сан Петролиум” ХХК Сонгинохайрхан дүүргийн 20 дугаар хороонд 16,000м³ багтаамжтай сав барьж байна. Үүнээс 8000м3 агуулахын нийт хөрөнгө оруулалтын хэмжээ нь 10.0 тэрбум төгрөг бөгөөд жилийн есөн хувийн хүүтэй хөнгөлөлттэй зээлийн хүрээнд 10.0 тэрбум төгрөгийн санхүүжилт арилжааны банкнаас авсан гэв.

Энэ агуулах наймдугаар сарын 20-ны дотор ашиглалтад орсноор Улаанбаатар хотын АИ-92-ийн хэрэглээний 13 хоногийн хэрэгцээг бүрэн хангах юм.

Харин “Шунхлай” ХХК 100,000 м³  буюу Монгол Улсад хамгийн том хүчин чадалтайд тооцогдох газрын тосны бүтээгдэхүүний агуулахыг Сонгинохайрхандүүргийн 21 дүгээр хороонд барьж байна. Агуулахын барилга угсралтын ажлын гүйцэтгэл одоо 40 хувьтай, дараа жилийн 12 дүгээр сарын 31-нд багтаан бүрэн ашиглалтад оруулахаар төлөвлөжээ.

Мөн Баян-Өлгий, Ховд, Орхон, Дархан-Уул, Өмнөговь аймгуудад нийт 10 агуулахын барилга угсралтын ажил үргэлжилж байна.