Өнөөдөр УИХ дахь АН, МАН-ын бүлгүүд болон Хүн намын зөвлөл хуралдсан. АН-ын бүлгийн тухайд Хэвлэлийн эрх чөлөө, байгаль орчны доройтол, бүлгийн дэд дарга нарын томилгоо, Монголбанкны Ерөнхийлөгчийн мэдээлэл зэрэг асуудлаар хуралджээ.
УИХ дахь АН-ын бүлгийн дарга Б.Түвшин:
1998 онд батлагдсан Хэвлэлийн эрх чөлөөний тухай хууль хэрэгжихгүй байна. Ялангуяа, тус хуулийн дөрөвдүгээр зүйл дээр “Төрийн байгууллага өөрийн мэдэлд хэвлэл мэдээллийн хэрэгсэлтэй байхыг хориглоно” гэж заасан. Гэвч энэ хууль хэрэгжихгүйгээр барахгүй төрийн бүх байгууллагууд өөрсдөө хэвлэл мэдээллийн албатай болсон. Энэ нь дөрөв дэх засаглалын буюу хэвлэл мэдээллийн зах зээлийг хумих, өрсөлдөх чадварыг бууруулах, нэг талыг барьсан мэдээллээр хангах нөхцөлийг бүрдүүлж байна гэж үзэж байна. Тиймээс цаашид хэвлэл мэдээллийн хэрэгсэл бие даасан, хараат бус байх ёстой гэсэн үзэл баримтлалыг тодорхойлж, ажлын хэсэг байгуулна.
Ташрамд, өнөөдрийн хуралдаанаар УИХ дахь Ардчилсан намын бүлгийн дэд даргаар Ш.Бямбасүрэн, Ж.Баярмаа, Г.Хосбаяр, Р.Сэддорж нарыг олонхын саналаар томилсон юм.
МАН-ын бүлгийн хуралд мөн Монголбанкны ерөнхийлөгч С.Наранцогт Төрөөс мөнгөний бодлогын талаар 2027 онд баримтлах үндсэн чиглэл батлах тухай УИХ-ын тогтоолын төслийг танилцуулсан. Ийнхүү УИХ-ын тогтоолын төслийг үзэл баримтлалын хүрээнд дэмжиж, хэлэлцүүлгийн түвшинд илүү сайжруулахаар ажлын хэсэг байгуулж, дахин хэлэлцэхээр болжээ.
ХҮН намын зөвлөл ч 2027 оны Төрөөс баримтлах мөнгөний бодлогын талаар хэлэлцсэн. Мөн УИХ-ын гишүүн О.Саранчулуун “Саадгүй орчин, хүртээмжтэй үйлчилгээний тухай” хуулийн төслийн танилцуулгыг хийжээ.
