Ерөнхий сайд Н.Учрал мэдээлэл хийлээ. Түүний яриаг бүрэн эхээр нь хүргэж байна.

Тэрбээр, “Монголын ард түмэндээ дахин нэг сайн мэдээ дуулгая.

Дөнгөж сая Монгол Улсын Засгийн газар “Оюу Толгой”-н баялгаас Монголын талын хүртэх өгөөжийг ирээдүйд 13 орчим их наяд төгрөгөөр нэмэгдүүлэх түүхэн хэлэлцээг хөрөнгө оруулагч талтай амжилттай эцэслэж, 17 жилийн дараа хувь нийлүүлэгчдийн гэрээнд нэмэлт өөрчлөлт оруулах тухай гэрээнд гарын үсэг зурж баталгаажууллаа.

Хувь нийлүүлэгчдийн гэрээний нэмэлт өөрчлөлтөөр менежментийн зардлыг бууруулж, давхардлыг арилгаснаар 8 орчим их наяд төгрөг, хувь нийлүүлэгчдийн зээлийн хүүг бууруулснаар 22 орчим их наяд төгрөг, нийт 30 орчим их наяд төгрөгийн зардлыг бууруулж чадлаа.

Энэ бол Монгол Улсын Засгийн газар хөрөнгө оруулагчидтайгаа үүссэн аливаа асуудлыг ажил хэрэгч, яриа хэлэлцээний зарчмаар шийдвэрлэж чаддаг бодит жишээ болж байна. “Оюу Толгой” төслийн үр өгөөжийг Монголын ард түмэнд бодитоор хүргэх итгэлийг баталгаажуулах хэлэлцэлд хүрч чадсан хөрөнгө оруулагч талдаа одоо талархал илэрхийлье.

Миний бие “Рио Тинто” группийн гүйцэтгэх захирал ноён Саймон Тротттой “Оюу Толгой” төслийг манай улсад илүү үр ашигтай байх дараагийн шатны хамтын ажиллагааны суурь болгож, тус төслөөс авах ногдол ашгийг 2027 оноос хуваарилж, Монголын талын өгөөжийг нэмэгдүүлэхээр харилцан тохиролцлоо” гэв.