Аж үйлдвэр, эрдэс баялгийн сайд Г.Дамдинням болон албаны хүмүүс шатахууны асуудлаар ОХУ-д ажиллаж байна. Товчхондоо тэд гуйлга гуйж яваа. Ерөнхий сайд тийм үүрэг өгсөн гэв.

Өчигдөр /2026.08.10/ шөнийн 00 цагт сайд Г.Дамдинням “Шатахууны асуудал шийдэгдлээ” гэж өөрийн цахим хуудсаараа дамжуулан мэдэгдэв.

Харвал,

“ОХУ-ын Эрчим хүчний яам, “Роснефть”, “Газпром нефть” компанийн удирдлагуудтай уулзсан. Энэ сард багтааж нэмэлтээр 25 мянган тонн АИ-92 автобензин, 5 мянган тонн онгоцны түлш авахаар болсон. Ачилт, татан авалтыг нэн яаралтай зохион байгуулна” гэжээ.

Харин АҮЭБЯ одоог хүртэл албан мэдээлэл гаргаагүй байна. Өөрөөр хэлбэл, сайд нь хувийн сэтгэл хөөрлөө л илэрхийлжээ.

Ачилт, татан авалт хийгдтэл хугацаа орно. Дотоодод нөхцөл байдал дээрдээгүй хэвээр байна. Нөгөө талд саваа бүрэн бэлдээгүй, үйлдвэр ашиглалтад ороход хоёр жил дутуу байгаа гэдгээ мартаж болохгүй.

Хойд хөрштэй ганцхан уулзалт хийгээд, бүх асуудал шийдэгдчихсэн юм шиг хөнгөн хандаж буй нь тэвчээргүй, амархан мартдаг хүний илэрхийлэл. Намар, өвлийн хэцүү сарууд одоо л эхлэх гэж байна.