Сүүлийн хэдэн сарын турш Баян-Өлгий аймаг, тэр дундаа казах угсаатнуудтай холбоотой асуудал сошиал орчинд эрчийг авч, үндэстний нэгдмэл байдалд халдахуйц талцал, хуваагдал үүсэхэд ойрхон байна. 

Уг асуудал сүүлдээ төрийн ордон дотор хэлэлцэгдэж, УИХ-ын гишүүн, Засгийн газрын сайд нар нь хоорондоо хэрэлдэн тэмцэлдэж байна. 

Тэгвэл Монгол Улсын Ерөнхийлөгч У.Хүрэлсүх 9 сарын 13-14-ний өдрүүдэд Ховд, Баян-Өлгий аймагт ажиллахаар болжээ. Тэрбээр аймгийн иргэдтэй уулзахаас гадна Өлгий сумын 2-р дунд сургуульд зочилж, багш сурган хүмүүжүүлэгч, ажилтнуудын төлөөлөлтэй уулзахаар төлөвлөж байгаа аж.

Энэ үеэр монголын ард түмний эв нэгдлийн бэлгэ тэмдэг гэгддэг Төрийн тэргүүний хувиар уг хэлцэл, тэмцэлд ул суурьтай хандаж, эв найрамдлыг сахиулах болов уу гэх хүлээлт иргэдийн дунд үүсээд байгаа юм. Дан ганц Касах угсаатны дунд үүсээд буй хүлээлт бус магад Монгол Улсын 3.6 сая хүн чих тавин ажиглах байх.

Ташрамд, Үндэсний статистикийн хорооны мэдээллээр Монгол Улсын нийт хүн амын 3.9-4.0 орчим хувийг казах угсаатан эзэлдэг бөгөөд ойролцоогоор 130,000 орчим казах угсаатан бий. Энэ бол Монгол Улсын иргэншилтэй казах угсаатан гэсэн үг. Тэгвэл эдгээр иргэдийн 76.5 хувь нь Баян-Өлгий аймагт оршин суудаг байна.