Өчигдөр /2026.08.12/ БНХАУ-д үйлдвэрлэсэн олон улсын “С919” онгоц анх удаа олон улсын нислэгээр манай улсад газардсан. Энэхүү онгоцыг Монгол Улс худалдан авах чиглэлээр холбогдох судалгаа мэдээлэл, уулзалт ярилцлагыг дотооддоо хийж эхэлжээ.
Тодруулбал, иргэний агаарын тээврийн паркийг шинэчлэх, олон улс, орон нутгийн нислэгийн зардлыг бууруулах хүрээнд лизингийн нөхцөлөөр худалдаж авахаар судалж байгаа гэв. Одоогоор хэдэн ширхэг онгоц худалдаж авах нь тодорхойгүй байна.
Нээлттэй мэдээллээс харвал “COMAC C919” нь,
- Шинэ үеийн CFM LEAP-1C хөдөлгүүрээрээ шатахуун зарцуулалтыг 15 хувиар бууруулах технологийн шийдэлтэй
- 158-190 хүртэлх зорчигчийн суудлын багтаамжтай
- БНХАУ-ын бүх хотуудад чөлөөтэй буух эрхтэй
- Олон улсын иргэний нисэхийн салбарын стандарт, аюулгүй байдлын шаардлагыг бүрэн хангасан гэрчилгээтэй гэж бичжээ.
Үнийн хувьд 100 сая ам.доллар буюу 350 тэрбум төгрөг.
Энэ тухай Зам тээврийн сайд Б.Дэлгэрсайхан,
“Дэлхий дахинд шатахууны хэмнэлттэй, ногоон технологийг чухалчилж буй энэ үед энэхүү “C919” хөлөг нь шинэ үеийн CFM LEAP-1C хөдөлгүүрээрээ шатахуун зарцуулалтыг 15 хувиар бууруулах технологийн шийдэлтэй. Энэ нь манай үндэсний агаарын тээвэрлэгчдийн зардлыг хэмнэж, тийзийн үнийг хямдруулах боломж бүрдүүлнэ.
Улаанбаатараас Бээжин, Сөүл, Токио, Хонконг болон Төв Азийн чиглэлд хийгддэг манай улсын иргэний нисэхийн үндсэн урсгалд техникийн хувьд оновчтой сонголт болно.
Ингэснээр хоёр улсын харилцаа, хамтын ажиллагааны хүрээнд эдийн засаг бизнесийн үйл ажиллагаа эрхлэх, эмнэлгийн үйлчилгээ авах, аялал жуулчлалыг хөгжүүлэх зэрэг олон талын ач холбогдолтой” гэжээ.
